Die Wilgies maak so!
Hier is baie ryk tradisies wat deel van ons skool vorm, waar trots so erg binne jou brand dat dit daardie hoendervleis-oomblikke skep. Te midde van ons gefokusde kurrikulum en dinamiese buitemuurse program, koester ons elke Wilgie om te groei en te ontwikkel tot sy/haar eie potensiaal.
Tradisioneel
Vlaghysing:
Elke oggend word die skool- en landsvlae gehys in die vierkant. Met vierkantopening word die nasionale lied en skoollied gesing tydens die vlaghysing.
Liedere:
Die skoollied, nasionale lied, “Pride of Wilgers” en graad 8-liedjie word deur leerders, na afloop van talle funksies gesing.
Graad 8-Steggies
Die Uitvoerende Komitee en Matriekraad, tesame met die voogpersoneel, ontwikkel ‘n bekendstellingsprogram wat die “Steggies” sommer vinnig diep gewortel by Die Wilgers laat voel.
Groentjiekonsert:
Daar is elke jaar ‘n konsert waaraan alle “Steggies” moet deelneem. Dit is ‘n goeie geleentheid om hul selfvertroue op te bou, nuwe vriende te maak en iets te gee om op trots te wees. Spesiale toekennings word aan die “Steggies” uitgedeel na die konsert, soos bv. die beste danser, die pliggie, die passievolste, ens.
“Steggie”-inhuldiging en Klokseremonie:
Elke “Steggie” loop met sy baadjie in die hand en met skool skoene om sy nek, gebukkend onder deur die Wilgersklok. Hul vat ‘n hap van ‘n wortel. Dit dien as teken dat hulle nou “diep gewortelde” Wilgies is.
Graad 8-kamp:
Die matriekraad neem die graad 8’s op ‘n kamp vir genot en spanbou.
Middelste trappe:
Geen graad 8 mag die middelste trappe gebruik tydens die hele jaar nie, ongeag die tyd van die dag.
Graad 8-korvee:
Graad 8’s werk as korvee by alle atletiekbyeenkomste onder toesig van matriekraadlede. Hulle ondersteun ook alle eerstespanne en help opruim na sportbyeenkomste.
Graad 12
Klokseremonie:
Matrieks kry kans om op hul laaste skooldag onderdeur die Wilgersklok te loop en dit te lui. Dit dien as afsluiting vir hul hoёrskoolloopbaan.
Saalopeninge:
Matrieks sit op die galery terwyl die res van die skool onder sit. Op hulle laaste skooldag draai die skool om en sing vir die matrieks die skoollied.
Boomplantdag:
Die matriekraad plant ‘n boom op die skool se perseel as herdenking van hulle dienstydperk.
Kleredrag:
Matrieks dra ‘n spesiale matriekdas en kan ‘n wit serp dra. Die matriekdogters dra witkouse.
Sport
Hop:
Na elke atletiekbyeenkoms en na afloop van die skoollied en die “Pride of Wilgers”- lied, begin die dirigente “hop” herhaardelik te sê. Leerders hop dan af van die pawiljoen en doen die hop dansie as afsluiting van die byeenkoms.
1ste span-wedstryde: Die leerders word versoek om soveel as moontlik te gaan ondersteun by eerstespan-wedtryde – so ook vir ander spanne van hul keuse. Wilgies gaan op hul hurke en slaan met hul hande op die gras tydens die eerstespan rugby tonnel.
Big Brag:
Die Interhoër atletiekspan word die aand voor die interhoër amptelik aan die ouers tydens ‘n spoggeleentheid bekendgestel. Die sangspan tree op en ‘n motiveringsspreker tree op.
Ons eerstespanne het almal ‘n “Whites” naam bv. White Sharks (Rugby), White Tigers (Dogtershokkie) en White Knights (Krieket) en nog vele meer. Hulle dra hulle “whites” met trots as hulle die skool op die sportveld verteenwoordig.
Sosiaal
Lentefees:
Leerders koop gekleurde poeier en gooi mekaar daarmee. Met die begin van Lente word talle funksies gereёl bv. ‘n Lentedans en stalletjies op Lentedag.
Waatlemoenfees:
Wilgies smul aan waatlemoene en smeer mekaar daarmee in die eerste kwartaal.
Valentynsbal:
Die graad 11’s reёl ‘n Valentynsbal as fondsinsameling.
Mnr. en Mej. Wilgie:
Die graad 10’s reёl ‘n spogaand vir liefdadigheid.
Waterkaskenades:
‘n Waterkaskenades word vir die hoof se verjaardag gehou. Die leerders baljaar en hou piekniek op die dag.
Matrieks teen die res:
In die derde kwartaal kan Graad 8-11 leerders hul name opskryf om ‘n res-span te vorm. Matrieks moet dan verdeel om teen die res spanne deel te neem in al die hoofsporte en moet verkieslik wen!
Akademie
Entrepreneursdag:
Die leerders wat besigheidstudies as vak het, verkoop hulle items in die vierkant tydens pouses.
PI-Dag:
Internasionale PI-Dag word jaarliks gevier. Daar word ook gekyk wie kan ‘n rubiks-vierkant die vinnigste oplos.
Geesweek:
Elke dag trek Wilgies soos ‘n spesifieke tema aan bv. Snaakse sokkies, ‘n vreemde hoed of das.